Papua Niugini i sori long lusim wanpela gutpela ragbi pilaia husat i save karim nem bilong PNG na plak bilong PNG long ol intenesenel ragbi tonamen.

Tu’u Maori em i wanpela Papua Niugini intenesenel ragbi lig pilaia husat i save pilai winga, senta, fulbek na faiv-et. Em i bin makim PNG long 2008 na pilai 3-pela gem wantaim PNG Kumuls.

Tu’u em hap Manus na Samoa. Mama i karim em long 22 Novemba 1988 long Auckland, Nu Silan. Em i gat 33 krismas long taim em i dai long Motor Neuron Disease (MND) long 4 Janueri 2022.

Em i kisim dispela sik MND long 2019 taim em i stap kepten bilong Ipswich Jets long Intras Supa Kap long Australia. Dispela sik i mekim na em i lusim ragbi lig na stap long haus sik inap em i dai. Long wanpela intaviu long 2019, Tu’u i tok; “Mi bin wanpela helti na strongpela ragbi lig pilaia. Ragbi bal em i pren tru bilong mi.

Taim mi stat lainim long wokabaut, mi holim ragbi bal pas long ol arapela samting.” “Laikim bilong mi long dispela gem i mekim mi pilai long Richmond Bulldogs, Cronulla Sharks, Melbourne Storm na makim PNG bihain mi go stap long Brisbane na pilai wantaim Ipswich Jets,” Tu’u i tok. Tu’u i pilai wantaim Jets inap 6 yia olgeta. Em i bin kamap kepten long 2015 na kisim jets i go long gren fainel na ol i winim Intras Supa Kap.

Tu’u i tok dispela em i bikpela mak em i putim long nem bilong em na i amamas long dispela mak. Long stat bilong Februeri long 2019, dokta bilong em i painim sik MND long bodi bilong em na i putim em long haus sik. Planti ragbi lig sapota long PNG, Australia, Samoa na wol i salim tok sori bilong ol long famili bilong Tu’u long sosel midia na arapela midia autlet.