Ol manmeri i selebretim Krismas na Nu Yia wantaim kain kain stail na pasin. Planti i save laikim spot long dispela taim, bilong wanem, ol i ken raun raun na bungim ol pren na famili na stori wantaim.

Long ol rurel hap bilong kantri, spot i save bungim ol pipel wantaim long amamas na selebretim dispela de wantaim ol wantok husat i kam long taun na arapela ples. Long Krismas na Nu Yia, Wod 20 long Leron Wantoat LLG long Markham Distrik, Morobe provins i kamapim wanpela mini soka tonamen long selebretim dispela tupela bikpela holide. As tingting bilong dispela tonamen em long pasim ol yangpela manmeri long Wod 20 na arapela wod klostu long ol long i no ken go aut na mekim ol kranki pasin olsem dring ‘hombru’ na smok mariwana na bringim trabel i kam long komyuniti. Tonamen dairekta Joel Gedisa i tok dispela liklik soka tonamen i kisim 12-pela tim bilong ol man na 6-pela tim bilong ol meri. Gem i pinis long Desemba 30 na ol i lukluk long kamapim narapela gen long Epril.

Ezekiel Lawrence i raitim