WANPELA lokal ragbi lig meri tim bilong Mosbi Not Wes i bin statim trening bilong ol tripela wik nau long Waigani Kone Tigers fil.

Dispela seleksen trening tim bilong ol meri i bin kamap bihain long Morota Off-sisen kompetisen we ol i bin kisim long wan wan pefomens bilong pilaia. Kosa bilong dispela lokal tim Apsie i bin statim trening bihain long fainel seleksen lista bilong ol meri long go resis wantaim ol arapela distrik bilong Pot Mosbi. Kosa Apsie i tok planti meri i lusim trening bikos long COVID-19 pandemik. Ol i les long go het wantaim trening bilong ol tasol sampela i trening yet maski taim no gut. “Mi laikim planti meri i mas kamap long trening na redi long pilai wantaim ol arapela tim bilong Sauten rijon long pefomens,” Apsie i tok. Apsie i tok stat trening long grasrut level na kisim strong long muv fowat long neks level na sapot no gat gutpela trening long lokal level em bai no gat gutpela rekot bihain taim. “Mi save hatwok long trenim ol meri long senisim pasin bilong ol long taim bilong trening na tu mekim ol save moa long ragbi lig maski ol i no save baim mi long trening ol,” Apsie i tok. Em i tok dispela kosa wok em voluntia wok bilong helpim ol meri kamap strongpela ragbi pilaia na tu i gat nem long kantri. Em i tok dispela wok i ken givim biknem long kosa taim ol tim pefom gut insait long fil. “Mipela trening ol meri long redi na go pilai long Mosbi Saut Stedium wantaim ol narapela tim long PNG Okids seleksen,” em i tok.

Jacklyn Kimala i raitim