HET Kosa bilong Morobe Etletik Alfred Tei i bin tokaut olsem Morobe Para etletik bai go het long trening bilong ol bihain long olgeta kisim veksin na ektiv long pilai.

Namel long olgeta etletik 2-pela meri pilaia i bin kisim veksin pinis wantaim 5-pela etlit husat ol bai pilai na joinim Para Olimpik Divelopmen tim bilong Morobe Provins. “Ol man husat i kisim veksin pinis nau stap long trening bilong ol na ol bai pilai long bikpela Common Wealth Gems we bai kamap long Inglan long 2022,” Kosa Tei i tok. Em i tok tim bai redi long stretim ol paspot bilong ol na NID kad bilong ol long trevol aut long pilai gem. “Mi askim olgeta etletik mas bihainim nupela pasin na mekim awenes long olgeta hap bilong kantri long pait wantaim COVID-19,” em i tok. Em i tok olgeta etlit i mas bihainim nupela pasin na rikwaimen bilong COVID-19 pandemik bikos dispela i ken helpim olgeta long pait wantaim dispela vires. Trening bilong olgeta etletik i stap long Ignatus Oval long Lae Morobe provins wantaim ol nupela pasin protocol long redi long neks yia 2022 Commonwealth Gems na Mini Pasifik Gems.

Paulus Tali i raitim