BSP PNG i bin sapotim Enga Provins long bildim nupela spot gren sten long Mommers Oval long Wabag taun las wik Trinde. Dispela sapot bilong BSP PNG em long holim Provinsal Gems bilong ol neks mun na redi long PNG Gems bai kamap long Novemba na tu long kamapim ples bilong ol yut long ol spot ektiviti bai kamap long Mommers Oval.

Brens Menesa bilong Wabag BSL Thomas Tembil i tok olsem komyuniti Benk na Pipel Benk BSP i save luksave long givim ol gutpela sevis sapot, maski salens bilong lo na odar hevi i no save stopim BSP long helpim ol komyuniti long kamapim gutpela ples bilong ol yut long bung wantaim. “Ol i bin nemim dispela oval bihain long leit Peter Mommers long tingim ol bipo hatwok bilong em taim em bin stap Faunda na Presiden bilong Enga

Futbal Asosiesen long Enga Provins,” Mista Tembil i tok. Em i tok BS i no save givim sevis long edukesen na helt projek tasol, ol i save operet long komyuniti spot na tu lukluk long sapotim ol komyuniti projek wankain ol dispela nupela bilding bilong grensten. “Mipela i bin kisim fil long konstraksen bilong nupela grensten long Mommers Oval long Wabag taun na redi long holim 2021 Provinal Gems long Ogas na tu redi long PNG Gems,” Tembil i tok. Presiden bilong Enga Futbal Asosiesen Ruddy David i tok tenkyu long BSP PNG long dispela sapot ol i bin givim long soim olsem namba wan spot projek long provins we dispela kain samting i no bin kamap long taim. Grup Menesa bilong BSP Daniel Faunt i tok BSP i bin investim K305, 000 stat long 2009 kam long Wabag Brens long komyuniti.

Jacklyn Kimala i raitim