MOROBE Provins i bin wok wantaim ol 6-pela distrik bilong awenes bilong COVID-19 long wan wan LLG na neks wik ol bai surukim go yet insait long Labuta LLG.

Dispela wok bilong COVID-19 awenes em gutpela bikos long seifti na helt bilong olgeta spot kod long kantri bihainim disisen bilong Deputi Kontrola Dokta Daoni olsem olgeta spot kod long kantri i mas kisim veksin.

Provinsal Spot Kondineta bilong Morobe Provins Ludwig Peka i bin tokaut klia long astingting bilong COVID-19 awenes long ol pipel bilong Nawaeb distrik na tu long ol nambis ples. Dispela awenes em long helpim olgeta spot kod i mas save gut long rot bilong COVID-19 na tu long lukautim ol spot faundesen long wan wan distrik bilong ol.

Em i tok dispela wankain wok bai kamap long olgeta distrik bilong Morobe Provins bikos helt bilong ol pipel em namba wan samting.

“Mipela i laikim ol pipel mas save long bihainim rot bilong COVID-19 wantaim ‘Nupela Pasin’, Peka i tok.

Em i tok ol tim bilong Spot Opis i bin go lukim ol ples olsem Mumeng, Wau Bulolo, Makam, Watut, Nawaeb na neks wik ol bai go lukim Labuta olsem namba wan awenes wok bilong ol.

Peka i tok dispela raun bilong ol long LLG na distrik em long tokaut long ol asosiesen i mas bihainim COVID-19 Protokol long abrusim sik na lukautim olgeta spot manmeri long komyuniti.

Paulus Tali i raitim