KUMUL Petrolium Holding Limited em i nupela naming rait sponsa bilong Nesenel Saut Basketbal Lig (NSBL) kompetisen long Goroka.

Kompetisen bai stat long neks mun long Goroka bihain long PNG Basketbal Federesen (PNGBF) i givim tok orait long gem i stat.

Long 2019, NSBL i bin holim tonamen long Lae aninit long sponsasip bilong Mineral Risos Divelopmen Kampani (MRDC) i bin kisim neming raits sponsa.

Dispela tonamen i bin kamap gut taim Sauts i bin winim mens taitel na Westen Original i kamap kwin bilong NSBL long gren fainel bilong man na meri.

Tasol COVID-19 pandemik tonamen i bin kansel long 2020 na nau KPHL i tekova long sponsarim dispela kompetisen na givim K50, 000 long NSBL long ranim sisen 2021 kompetisen stat long Fonde Julai 1, 2021.

Dispela toksave em patron bilong NSBL John Yawari i bin mekim long taim bilong Basketbal Federesen PNG (BFPNG) Ekseketiv Opisa Nick Daroa i bin stap wantaim long Hilton Hotel long Pot Mosbi.

Dispela kompetisen i stap inap 13 yia nau na Yawari i tok tenkyu long BFPNG na ol sponsa husat i bin sapotim NSBL namel long ol dispela yia na bai sapotim ol long bihaintaim tu.

“Mi laik tok tenkyu long BFPNG long tok orait long dispel kompetisen i kamap memba na mipela baim afiliesen fi bilong 2021. Mi save basketbal i no bikpela spot long PNG. Olgeta pipel na sponsa i save laikim ragbi lig. Tasol basketbal em i gem olgeta manmeri na pikinini i save pilai long olgeta hap bilong kantri tu.

“Salens nau em long olgeta bikpela kampani long long Sauten Hailens provins long sponsarim basketbal insait long provins,” Yawari i tok.

BFPNG presiden Karo Maha Lelai i tok amamas long ol sponsa bilong basketbal insait long kantri na givim go het bilong em long NSBL.

“Mipela kisim tok orait bilong kontrola na nau em i wok bilong ol ogenaisa long lukim olsem ol inap kontrolim niupela pasin long taim bilong tonamen,” Lalai i tok.

Joseph Dawai i raitim