EPG Enga Mioks i wok strong yet long winim wanpela raun bilong 2021 Digicel Kap bihain long ol i bin lus 5-pela raun olgeta.

Kosa bilong Mioks Andiki i no amamas taim ol Mioks i bin lusim faivpela raun bilong Digicel Kap na tu wokim wankain asua long taim bilong gem.

Long stat bilong sisen i bin lukim ol planti nupela pilaia joinim Mioks na pilai 4-pela raun bilong sisen inap long las wik raun 5 bilong Digicel Kap i bin lukim olgeta olpela Mioks pilaia go bek joinim tim na salensim ol Wamp Mt Hagen Eagles.

Tupela brata yet i bin redi long bung long raun 5 bilong sisen tasol bikpela pisin Eagles bin daunim liklik pisin Mioks wantaim gutpela namba bilong sapota bin kamap long lukim gem.

Moa sapota bilong ol Eagles i bin daunim poin bilong ol Mioks tasol dispela i no pinis bilong sisen i gat planti moa stap we bai ol Mioks i ken wok strong moa long traim winim sampela raun.

Long namba wan hap bilong gem Mioks blokim Eagles gut tasol liklik asua long lusim bal na holim bal i bin givim planti sans long Eagles i ken brukim banis na putim trai.

Tupela wantaim i bin gat wankain skoa long namba wan hap tasol bihain long wanpela Mioks pilaia i bin sin bin na givim sans long bikpela pisin Ealges.

Kosa Andiki i tok planti asua i stap namel long wan wan pilaia tasol nidim moa taim na strong long wok long en inap gutpela senis bai kamap.

Ol Mioks i redi long salensim Waghi Tumbe taim Hagen Eagles bai bungim ol PRK Mendi Muruks long raun 6 bilong Digicel Kap long dispela wik.

Jacklyn Kimala i raitim