NAMBA WAN hap bilong 2021 PNG Air Athletics Grand Prix Siris i bin soim ol nupela talen bilong Trek na Fil long Pot Mosbi long las wik

Ol etlit i bin mekim gutpela pefomens long trek we Dilu Goiye bilong Simbu husat i bin ranawe wina insait long 5000m na tu ran seken long 3000m resis.

Long wankain taim tu ol etlit bilong Bogenvil i save beis long NSI, Jonathan Dende na Alphones Igish tupela wantaim i bin makim wankain lain long 400m, kloking taim bilong 48.74 na 48.92 seken.

Na etlit bilong Is Nu Briten Adolf Kauba i bin wina long 800m na bin mekim strongpela so long 400m kloking taim 49.31 seken long namba 3 ples.

Long divisen bilong ol meri Lenia Gilis bilong Wes Nu Briten i bin gat gutpela wiken wantaim strong so long olgeta tripela sprint na Edna Boafob i bin kisim sans long daunim skil bilong em taim em redi long Heptathlon neks yia.

Mary Tenge sumatin bilong Utmei sekenderi skul i bin luk strong long tupela 3000m na 5000m ran na em winim tupela wantaim yangpela skul meit bilong em Monica Kalua husat i bin kam namba tu na tri ples long 1500m sprint long longpela resis.

Insait long fil resis Leah Neil bilong ENB i bin winim ol meri long longpela jam na hai jamp. Long ol man divisen dispela kompetisen i bin givim sans long divelopim ol talen Kenneth Harrison na Isaac Kambuka long resis wantaim ol sinia etlit Eldan Toti, Rocka Manau na Robert Oa.

Jacklyn Kimala i raitim