NAMEL long olgeta spot,  Ragbi Lig na Kriket i bin setim bikpela eksampel long ol arapela nesenel na lokal spot kod i lukim na bihainim lek mak bilong tupela.

Long raun bilong kompetisen, olgeta tim i kamap wantaim ful COVID-19 Protokol bilong ranim kompetisen wankain olsem kriket i mekim long Amini Pak.

Long raun 2 bilong kompetisen i bin gat wiken gem dabol leda we Dabaris i bin autim Lahanis wantaim bikpela skoa mak 34-22 bihain em Wigmen i bin daunim Eagles long wanpela poin 11-10 long Sarere. Na long wankain taim tu long Sande, Cuttters dro wantaim Gurias 22 poin, na bihainim ol em Muruks i autim sponsa meit bilong en, Galp Isou 34-28.

No gat ol sapota long tupela raun wantaim bihainim toktok bilong Nesenel Kontrola inap tupela mun bikos long COVID-19.

Ragbi Lig na Kriket i bin go wantaim rot bilong COVID-19 Protokol. Ol i bin salim askim bilong ol na i bin kisim tok orait long Opis bilong Kontrola bilong Nesenel Pandemik Rispons.

Olgeta ragbi lig pilaia i bin kisim veksinesen long resis, tasol sampela pilaia bilong ol arapela Frensais klap i bin lusim bikos ol i bin les long kisim veksinesen.

Bikpela salens na strongpela COVID-19 Protokol i bin kamap namel long ol pilaia na edministreta bilong kompetisen long lukautim seifti bilong ol spotman na meri long insait na ausait bilong fil.

Namel long dispela sisen dro i gat tupela hap tasol bilong Digicel Kap kompetisen, em Pot Mosbi na Lae, inap olgeta samting em kamap orait. Na tu, bai no gat ol sapota long lukim gem inap Kontrola givim tok orait bihain long tupela mun.

Raun 1 na 2 i pinis na nau olgeta Frensais klap i redi long pait long raun 3 long dispela wiken long Lae na Mosbi.

Olgeta tim i trening long winim ol gem bilong ol, tasol bai no gat gutpela sapot bilong ol pren na famili.

Long olgeta raun COVID-19 Protokol bai stap strong inap 2021 sisen i pinis.

Jacklyn Kimala i raitim