OL Sumatin Representiv Kaunsil (SRC) long Yunivesiti bilong Papua Niugini (UPNG) i bin statim ol spot kod bilong ol wantaim basketbal na Ragbi 9’s long las wiken long Yunivesiti yet.

Dispela 3-pela de Ragbi 9s tonamen i bin kamap long bungim olgeta fekaliti bilong skul long pilai wantaim na mekim ol yet bisi long spot na tu long ekademik level tu.

“As tingting bilong dispela spot insait long yunivesiti em long mekim ol sumatin i no ken go ausait na kisim hevi na tu dispela i ken bringim divelopmen long ol,” Meri Sumatin Presiden bilong UPNG, Nancy Paglau i bin tokim Wantok Niuspepa.

Mis Paglau i tok long kalenda bilong SRC spot em wanpela sosel ektiviti we ol i bin plenim long holim tonamen bilong olgeta spot kod olsem basket, ragbi 9’s, ragbi 13’s, volibal na soka.

Em i tok dispela 3-pela de Ragbi 9’s tonamen i bin kamap bihainim taim tebol bilong SRC na tu ol yet i bin sponsa wantaim K20,000 long ranim dispela tonamen.

“Mipela ol SRC i go pas long sponsa wantaim mani mak K50, 000 bilong olgeta spot kod, we ol arapela spot kod olsem basketbal, volibal na soka em K10, 000 prais mani tasol long Ragbi 9’s em K20, 000,” Paglau i tok.

Ol 24 man tim bilong UPNG skul i bin resis long Ragbi 9’s na no gat meri tim wantaim bikpela sapot bilong ol PNGNRLC referi na ol sumatin opisal lida long ranim dispela tonamen.

Jacklyn Kimala i raitim