MAIAMATA Ragbi Lig Kompetisen long lowa Sogeri ausait long Pot Mosbi bai kisim sapot bilong gavman bilong ol.

Ekseketiv opisa bilong memba bilong Kairuku-Hiri, Alfred Kennedy Edene i tok memba bilong ol, Peter Isoaimo, i save olsem ragbi lig i wok long senisim laip bilong planti ol grasrut yut.

Maiamata lig em wanpela nupela afilieit bilong PNG Ragbi Futbal Lig long dispela yia 2021.

“Dispela i bringim namba bilong Koiari lig i go antap long tripela kompetisen nau. Tupela i stap pinis em Koiari na Trans-Vanapa Brown na olgeta i stap long Kairuku-Hiri distrik tasol,” Edene i tok.

Em i tok Mista Isoaimo i mekim K20, 000 komitmen long dispela lokal lig. Em i bin givim K30, 000 wan wan long Koairi na Trans-Vanapa Brown long dispela sisen.

“Ol dispela mani MP i bin givim long olgeta ragbi lig kompetisen long distrik i kamap olsem K80, 000. Dispela mani mak em i bilong ragbi lig tasol na em i no bungim wantaim sampela mani em i bin givim long ol narapela spot long distrik,” Mista Edene i tok.

Olgeta taim MP i save helpim Koiari bikos em i setim standet olsem wanpela top lig insait long distrik bilong em.

Edene i tok Koiari lig i bin kamapim intenesenel pilaia olsem West Tigers pilaia Edene Gebbie, pastaim Kumul Joshua Abavu na brata bilong em Blantna Adam Korave wantaim leit Kato Ottio na pastaim pilaia Obed Batia.

Batia em i bin namba wan Kumul pilaia bilong Koiari na em i bin pilai long Fairdeal West na bihain wantaim Hobar West.

Leit Ottio i bin stap wantaim Camberra Raiders long fida klap NSW Mounties. Nau yet Gebbie i kamap olsem piksa bilong ol yangpela long Koiari eria husat i go insait long Australia NRL. Em i bin sain wantaim South Sydney Rabbitohs las yia, tasol em i bin witdro na kam bek long PNG. Dispela sisen em i sain wantaim West Tigers na fida klap West Mappies long NSW kap.

Joseph Dawai i raitim