VANIMO Futbal Asosiesen long Wes Sepik provins i bin setim rot bilong ol arapela memba asosiesen long bihainim na i ken afiliet wantaim PNGFA.

Olpela nem bilong ol olsem Vanimo Urban Futbal Asosiesen bai nau i kisim nupela nem, Vanimo Fubtal Asosiesen (VFA) taim ol i redi long futbal famili.

Bihain long 17 yia hatwok bilong inapim olgeta level bilong futbal rot, ol opisal husat i bin makim olgeta distrik insait long Sundaun Provins i bin amamas long welkamim Presiden bilong PNFA John Kapi Natto.

As tingting bilong dispela raun bilong Presiden Kapi Natto long Vanimo em hap wok bilong PNGFA draiv long bringim bek futbal asosiesen i go insait bek long futbal famili.

Dairekta bilong Memba Asosiesen, Stanley Khanna i tok olsem VFA i no laik pilai politik na bruk wan wan olsem na ol i laik bungim olgeta distrik long provins long kam aninit long wanpela ambrala na wokim asosiesen bai PNGFA i ken luksave.

Olgeta i amamas long wok bung wantaim na bringim Vanimo go bek insait long futbal famili na bai ol i ken pilai insait long PNGFA tonamen olsem Nesenel Klap sempiansip bilong man na meri wantaim.

Sandaun Provinsal Gavman i bin soim sapot bilong ol baksait long futbal na tok tenkyu long PNGFA long go lukim namel bilong taun provins we olgeta i bin stap insait long futbal long provins na tu lukfowat long en.

Ol i bin makim ol interim komiti grup long go pas na wok wantaim PNGFA long kisim Provinsal mak pastaim long kamap ful memba bilong PNGFA.

Ol memba bilong dispela interim komiti em Willie (Presiden) Jacinta Dengan (Vais Presiden) Seketeri Trevor Anion na Tresera Clement Lepo.

Khannna i tok PNGFA bai lukautim ol na givim olgeta sapot long planti rot.

Mista Khannai tok tenkyu long Lawrence Seneve long bungim olgeta wantaim long putim Vanimo Futbal Asosiesen i go bek long fil.

Jacklyn Kimala i raitim