DEPUTI Kontrola bilong Nesenel Pandemik Rispons, Dokta Daoni Esorom, i tok olsem olgeta Spot Kod husat i afiliet aninit long PNG Spot Faundesen, i mas kisim veksinesen bilong ol spotman na meri wantaim ol edministreta.

Dispela em olsem rikwaimen bihain long Kontrola bilong Nesenel Pandemik Rispons Yunit i bin givim tok orait long statim olgeta spot kompetisen na lukautim ol long stap seif aninit long COVID-19 Protokol.

Dokta Esorom i tok namel long lukautim ol kompetisen long stat, ol i mas;

1. Raitim wanpela leta bilong askim kontrola bilong kompetisen long stat pilai;
2. Wan wan spot kod i mas gat COVID-19 Protokol bilong ol long go wantaim askim leta bilong ol.
3. No gat sapota inap tupela mun pastaim long ol i kisim tok orait
4. Maski veksinesen, em laik bilong wan wan, tasol ol spot kod i mas kisim veksinesen long seifti na protektim ol spotman na meri na ol edministreta.

Namel long ol 16 spot, Ragbi Lig na Kriket tasol i bin kisim veksinesen pinis na ol i statim kompetisen bilong ol wantaim COVID-19 Protokol bilong ol.

“Mipela i yusim ol nesenel ragbi lig kompetisen olsem eksampel long ol arapela spot kod bilong nesenel na lokal i ken bihainim COVID-19 protokol na mekim pilaia na edministreta i mas kisim veksinesen long protektim ol,” Dokta Esorom i tok.

Em i bin amamas long tupela edministreta bilong ragbi lig na kriket long kamap wantaim COVID-19 Protokol na statim kompetisen bilong ol.

“Mi askim tu olgeta arapela spot kod long bihainim dispela eksampel bilong ragbi lig na kriket edministreta long kisim veksinesen sapos ol i laik statim kompetisen,” Dokta Esorom i tok.

Em i tok tu olsem ol edministreta bilong ol arapela kod husat i gat interes long statim kompetisen bilong ol long bihainim ol rot na raitim leta na wantaim ol COVID-19 Protokol i go long PNG Spot Faundesen Pandemik Menesmen Komiti na Nupela Pasin.