KAIRUKU Hiri MP na Vais Minista bilong Treseri Peter Isoaimo i tokaut olsem Bisogo Oval long Lakoki bai i gat nupela infrastraksa.

Isoaimo i mekim dispela toktok na amamas tru long lukim sampela ol pilaiai kamapim gutpela ragbi lig gem. Trans-Vanapa Ragbi Lig ekseketiv Presiden, Walo Auda i salim infrastraksa divelopmen plen bilong banis, ol gol ponsa grensten i go long opis bilong em.

Em i bin mekim K30, 000 komitmen tasol em i bin givim K10, 000 long 9s pri-sisen gem na narapela K20, 000 i stap yet. Kairuku Hiri distrik Sif Ekseketiv Opisa Alfred Kennedy Edene bai givim dispela mani long ol.

Dispela luksave i bin go long ol komyuniti long Trans-Vanapa Brown LLG husat i save stap insait long Kairuku Hiri distrik na Mista Isoaimo i amamas tasol long sapotim ol.

MP Isoaimo i tok nau yet dispela fil i no gat fens, opis na ples bilong sindaun na gol pos. Em i tok lig i nidim ol dispela infrastraksa divelopmen long impruvim standet na level bilong kompetisen.

Gol pos ol i yusim nau em ol i wokim long mambu na em i olsem stail bilong ol lain bilong viles.

Liklik fens bai inap pasim ol sapota long kam insait long fil na amamas long taim ol pilaia i skoim trai na i distebim planti ol pipel long lukim gem gut.

Em i tokim pablik olsem dispela em i wok bilong em olsem MP long lukim wanem samting ol pipel i nidim na givim sevis long ol pipel na komyuniti. Mani bilong ol pipel na i no praivet mani

“Dispela bai mekim na standet bilong gem bai go antap long narapela level,” em i tok.

Kairuku Hiri CEO, Edene i tok dispela olgeta samting Vais Minista i tok bai kamap kwiktaim.

Enede i askim Trans-Vanapa Lig Presiden Auda na ol ekseketiv bilong gem long stretim edministresen plen bilong ol na kam kisim mani bilong mekim wok olsem MP i tok.

Joseph Dawai i raitim