LONG Kwalifai long Wol Kap bilong tupela soka tim bilong man na meri wantaim i nidim gutpela plen na ikwipmen long ranim trening na lukautim fitnes bipo long go salens long FIFA Kap long 2023.

Papua Niugini Futbal Asosiesen i bin kisim tok orait pinis long Opis bilong Nesenel Pandemik kontrola long statim Nesenel Soka Lig na ol Lokal Memba Asosiesen lig kompetisen bilong ol long dispela yia,” Jenerel Seketeri bilong PNGFA Pius Letenge i bin tokim Wantok Niuspepa.

Long kwalifai long Wol Kap FIFA nidim planti gutpela teknikel trening fesiliti long ranim trening na tu long helpim ol pilaia long kamap long wankain level olsem ol arapela intenesenel pilaia.

Letenge i tok COVID-19 i bin bagarapim olgeta plen bilong PNGFA tasol i gat sampela lokal memba asosiesen kompetisen i ran stap wantaim trening na tu bai gat sampela moa divelopmen long lokal kompetisen.

“Mipela i plen long statim Nesenel Soka Lig (NSL) kompetisen wantaim 10-pela tim long resis tasol 14 tim olgeta i rejista na redi long resis wantaim long dispela sisen,” Letenge i tok.

“Mipela nau i toktok long 10-pela tim tasol i resis na lusim ol arapela 4-pela tim i ranim olgeta 14 tim.

Em i tok FIFA Wol Kap Kwalifaia resis bilong man na meri tim wantaim bai kamap long Australia long neks yia.

Jacklyn Kimala i raitim