NAMBA wan taim bai ol meri Aroma i pilai ragbi lig long Keleone Ragbi Futbal Lig wimens 9s tonamen long Sentral provins long dispela mun Jun 22-25 toinamen bai kamap long Wagula Pak.

Wagula Pak 9s kap na kes mani bilong kap, pleit na Boul bai ol tim i go insait long fainel bai inap winim na kisim.

Dispela em i namba wan taim bilong ol meri long Aroma i putim tim long pilai ragbi lig. Ol 17 tim bai pilai long dispela kompetisen na bai ol i pilai long foapela pul.

Tonamen dairekta, Avis Vanua, i salim toksave long PNG Orchid kepten Elsie Albert na pilaia Carol Humeu long stap long dispela tonamen.

Albert na Humeu i tok orait long go stap long taim bilong dispela tonamen. Tupela bai mekim toktok na serim ekspriens bilong tupela long pilai ragbi lig long nesenel wimens tim.

Taim ragbi lig stat long Aroma ol man tasol i save pilai dispela spot na ol meri i save pilai netbal tasol.

Vanua i tok dispela tonamen bilong ol meri inap mekim ol meri i pilai long daunim hevi bilong jenda vailens na ol man i ken luksave long ol meri.

Ol ples long Paramana i go long Gavuone, bai traim bun long Wagula Pak long lukim olsem wane mol bai inap pilai gut.

Em i tok as tingting bilong dispela tonamen em long soim talen bilong ol meri long dispela spot na planti ol yangpela meri i amamas long pilai.

Sampela tim i givim nem pinis na stat trening stap. Tim afiliesen fi em K300 long ol man na meri na ol i mas baim bipo long Jun 18.

Joseph Dawaiiraitim