OL "Futsal King" bilong Oceania, em Kurukuru National Futsal tim bilong Solomon Ailan. Bai ol i stap long Grup C wantaim Portugal, Morocco na Thailand long Futsal World Cup.

Ol Kurukuru bai makim Oceania rijon long Futsal World Cup long kantri Lithuania long Yurop long mun Septemba, bihain long ol i bin winim OFC Futsal sempionsip long 2019.

Dispela bai namba 4 taim long Solomon Kurukuru i makim Oceania rijon long Futsal World Cup.

Dickson Kadau, bilong Solomon Ailan Futbal Federesen Bis Soka na Futsal Divelopmen opisa i tok, trening skwat bilong ol bai go long Australia long sampela wik bihain na trening  na bihain long dispela bai ol i makim tim bilong go pilai long Futsal World Cup.

Em i tok i no gat gutpela ples bilong trening long Honiara, na nau ol i save trening long wanpela basketbal kot bilong Chinese Association long China Town.