MOSBI Saut MP Justin Tkatchenko i sapotim Mosbi Saut Ragbi Lig long kamap narakain long sampela kompetisen insait long Nesenel Kapital Distrik.

Tkatchenko i mekim narapela bikpela komitmen long K200, 000 long sisen 2021 bilong operesen kost bilong edminstresen na kompetisen.

Dispela mani em bai givim i bungim wantaim sampela mani em i bin givim pinis na i kamap olsem K2 milien long taim Mista Tkatchenko i bin stat long helpim spot na yut divelopmen long 2012.

Long helpim na sapotim dispela North Build Ltd Ekseketiv Dairekta Graham Boddington i givim K20, 000 long kompetisen bilong ol meri.

Dispela mani bai mekim ol meri pilai ragbi lig na divelopim gem na bai ol inap kisim luksave long nesenel ragbi lig level.

Kompetisen bilong ol meri i gro na planti tim i kamap na dispela i soim gutpela sain long komyuniti inap stap gut.

Tkatchenko i amamas olsem wimen kompetisen i mekim na planti nupela tim olsem 6 Mail Crows na 2 Mile wantaim ol PNG Orchid pilaia olsem Della Andama na Carol Humeu i laik kam pilai long Mosbi Saut Ragbi Lig Kompetisen. 

Em i tok yumi mas lukim ol meri olsem ol i kul patna na givim fridom bilong wokim disisen na fridom bilong muvmen long wanem samting ol i laikim na pilai ragbi lig em i wanpela bilong ol.

“Yumi sapotim ol meri long kamapim wanbel namel long ol man na helpim ol long pilai na ol i ken helpim komyuti bilong yumi wantaim,” em i tok.

Dispela em i namba wan taim Northbuild Limited Ekseketiv Dairekta Boddington i kamap wantaim K20, 000 sponsasip long sapotim kompetisen bilong ol meri.

Boddington i tok sapotim wimen kompetisen bai mekim ol pipel long no ken kamapim Jenda Bes Vailens insait long komyuniti na luksave long patisipesen bilong ol meri insait long sosaiti.

“Yumi mas soim rispekt long ol mama na pikinini meri long pilai ragbi lig long wanem ol i save mekim sampela bikpela wok insait long komyuniti bilong yumi,” em i tok.

Tkatchenko i tok tenkyu long Boddington long sapot bilong em na i tok dispela em i stat tasol na planti ol bisnis haus bai kam long helpim ol tim insait long kompetisen.

Joseph Dawai i raitim