Maski i gat kainkain tingting i bin kamap na sampela pilaia bilong klap i go joinim nupela tim bilong Nesenel Soka Lig faivpela taim defending sempion Lae City Futbal Klap, i statim sikispela wik trening bilong ol pinis long holim NSL tropi wanpela moa taim.

Ol 21 man skwat wantaim liklik mejik lek man Yagi Yasas, sisen 2020 golden but wina Jonathan Allan na Joshua Talau bilong 2020 NSL sisen anda dok Vitias United i traim long luksave long ol yet.

Lae Biscuit sponsa Lae City FC i sainim wanpela Fiji bes Nigeria pilaia Jibola Afonja pinis. Pastaim em i bin pilai wantaim Suva FC. Em i joinim klap long las mun na em tu i stap insait long tim nau.

Het kosa Bob Morris i tok em i fokas long fisikel fitnes bilong ol na lukluk long mak bilong go insait long sisen 2021.

“Mipela i redi long pri-sisen hap bilong trening long dispela wiken we mipela bai fokas long fisikel fitnes level bilong olpilaia na taim ol i kam bek gen long malolo. Neks wik mipela bai go insait long kompetisen,” Morris i tok.

Tupela Ecuador pilaia Abdias Aguirre na Gustine Vergara bai i no inap joinim tim long dispela yia tasol ol nupela pilaia i wok long save long ol yet.

Em i tok em i hat liklik long toktok hariap tasol dispela tim em i balens na bai ol i wok strong long redi long kisim ol bikpela salens olsem Osenia Lig kompetisen.

COVID-19 i stap insait long kantri olsem na tim menesmen i wok long mekim moa awenes long ol pilaia long lusim ol krangki tingting na kisim tambu sut.

“Mipela bai kisim COVID-19 tambu sut bikos em i wanpela protokol bilong klap na em i gutpela long ol pilaia,” em i tok.

Lae City FC bai trevol go aut long kantri long pilai Oseania Lig Kompetisen na ol bai kisim COVID-19 tambu sut pastaim.

Olsem Lae Biscuit sponsa Lae Snax Tigers i kisim veksen pinis long pilai long 2021 Digicel kap kompetisen na em i wankain tu long ol pilaia i mas kisim dispela sut tu.

Joseph Dawai i raitim