DISPELA 2021 Digicel Kap kompetisen bai kik ov long Jun 5 dispela wiken bihainim disisen bilong PNGNRLC Bod i kam long Pandemik Kontrol Opisa.

Siaman bilong PNGNRLC Adrian Chow i tok long bihainim disisen bilong PNGNRLC long surukim dispela kompetisen inap tripela wik.

Ol i bin holim bung wantaim olgeta Frensais Siaman, CEO na Menesa long Me 7 i go inap 9, 2021 na ol i bin agri olsem dispela 2021 kompetisen bai ran yet.

Dispela kompetisen bai i kamap bihainim laik bilong ol wan wan pilaia na wok manmeri husat i laik kisim veksin.

Dispela disisen i kam long opis bilong Pandemik Kontrola husat i bin givim tok orait,” Chow i tok.

Em i tok tupela namba wan wik stat long Me 10, 2021 ol i bin lukim Dokta Kapua Kapua, Gideon Kendino na Ivan Ravu Junia long holim awenes wantaim olgeta frensais pilaia, wok manmeri na opisa.

Chow i tok olgeta pilaia, wok manmeri na opisa husat i bin kisim veksin i mas salim grin fom bilong ol long PNGNRLC Menesa Ora Gairo hariap long rejista na i ken pilai long dispela Digicel Kap sisen kompetisen.

Em i tok long taim bilong statim kompetisen long Jun 5, 2021 long Raun 1 dro na ples bilong pilaia wantaim no gat sapota,” Chow i tok.

“Mipela bai toksave long neks wik sapos sampela senis i kamap gen long dispela sisen dro.”

Chow i tok surukim tok tenkyu long PNGNRLC Bod long Deputi Pandemik Kontrola Dokta Daoni Esorom na opis bilong Kontrola wantaim wan wan PHA menesmen na wok manmeri, ol sponsa na patna bilong frensais na pilaia, wok manmeri na ol opisal long kisim gutpela tingting long las tripela wik.

Jacklyn Kimala i raitim