OLGETA Digicel Kap tim pilaia wantaim kosa na wokmanmeri bilong NCD Vipers, Kroton Wigmen na
Galp Isou i kisim COVID-19 veksin bilong ol long dispela wik Tunde long Rita Flynn.

Dispela ol tim i kisim bihain long Kimbe Cutters, Rabaul Gurias na Sentral Dabaris i bin opim rot
bilong veksinesen long ragbi long las wik.
Wankain i kamap long ol Digicel tim beis long Lae; Snax Tigers, PRK Mendi Muruks, Enga Mioks na go
antap long Hailans em Mt Hagen Eagles, Waghi Tumbe.
Olgeta pilaia, kosa na wokmanmeri bilong Frensais tim i mas kisim veksin na pilai sapos no gat ol bai
no inap pilai long 2021 Digicel kap kompetisen.
Siaman bilong PNGRFL Sandis Tsaka i tok dispela disisen i bai kamap long wan wan klap wantaim
kosa bilong ol bikos em i no gat tok tok long dispela disisen na tu stap long yumi wan wan.
Long wankain taim tu dispela bai bihainim askim bilong PNGRFL bihainim disisen bilong Nesenel
Pandemik Kontrola David Manning long harim tok.
Sampela ol pilaia bilong Enga Mioks i bin lusim kemp na go long haus bikos ol les long kisim veksin na
sampela i wanbel long kisim veksin na stap bek long Lae.
Dispela em laik bilong wan wan bikos olgeta pilaia i gat rait olsem Praim Minista James Marape i tok
pinis olsem long kisim veksin em i stat long wan wan na no gat man i pusim ol long kisim.
End..
Poto: Siaman bilong NCD Moni Plus Vipers Dokta Newton Albert i go pas long kisim veksin wantaim
olgeta Vipers pilaia na kosa. (Poto PNGRFL)
Poto 2: Hela Wigmen pilaia na ol wokman i go lukim ol helt wokman meri bilong Rita Flyn long taim
bilong kisim veksin. (Poto PNGRFL)
Jacklyn Kimala i raitim