PRESIDEN bilong Bisogo Vipers na pastaim soldia bilong PNG Difens Fos kenol Walter Enuma i tok
amamas long nupela ekseketiv bilong Trans-Vanapa Brown Ragbi Lig (TVBRL) kompetisen long
bringim dispela spot i go long rural eria ausait long Pot Mosbi.

Enuma i tok em i amamas long nupela presiden Walo Auda long hat wok na kamapim dispela lokal lig
wantaim sapot bilong Kairuku-Hiri MP Peter Isoaimo na ol 13 LLG wod kaunsila bilong distrik.
Wantaim sapot bilong K20, 000 mani long 9s tonamen i kamap MP Isoaimo i soim olsem em i laik
wok wantaim ol yut long distrik bilong em.
“Dispela tingting bilong Auda long kisim ragbi lig i kam long rural eria bai inap divelopim ol yut long
soim talent bilong ol long sampela ol siti tim husat i wok long painim ol gutpela pilaia long strongim
tim bilong ol long siti kompetisen,” Enuma i tok.
Ragbi lig ol i save pilai olsem sosol gem long komyuniti tasol nau i kamap olsem wanpela tonamen
long Bisogo Oval.
“Mipela olgeta bai helpim na rispektim ol ekseketiv bilong lig long taim dispela kompetisen i liklik yet
i go inap long em i kamap strong,” em i tok.
Enuma i tok yumi olgeta mas tingim olsem Auda, deputi kaunsila bilong em Junior Mulina Jackson
Komba i wok voluntia tasol na ol nidim sapot bilong yumi long wok wantaim ol.
“Yumi mas rispektim ol na mekim dispela kompetisen i kamap gut na sisen propa bai kamap. Yumi
gat longpela rot long go na no ken lusim tingting olsem em i no isipela rot,” em i tok.
Long wankain taim yet Trans-Vanapa lig presiden Auda i tok olgeta klap mas peim K500 afiliesen na
K50 pilaia rejistresen fi na go mekim medikol sek long ol inap pilai long propa sisen o nogat.
Auda i tokim ol gen olsem sapos husat pilaia o klap i no baim fi bilong ol bai ol i no inap pilai long
dispela kompetisen. Em i strongim dispela tingting i bin kamap long Enuel Jeneral Miting (AGM)
resolusen bilong tonamen sotpela taim i go pinis.
Em i strongim tingting i bin kamap long AGM tu olsem olgeta pilaiai mas dipositim rejistresen long
PNGRFL akaunt na klap afiliesen mas i go long tresera Jackson Komba pastaim long propasisen.
Tresera Komba tu i mekim sampela toktok na i tok olsem sampela klap i baim hap na bai ol inap
pinisim long ful amaunt tasol ol i mas tingim tu olsem pilaia registresen i olsem mani bilong insurens
kava bilong ol.