PNG Hunters i nidim man pawa insait na ausait long fil bihain long South’s Logan Magpies autim ol 48-14 long las wik Sande long Davies Pak.

Taim Magpies i bin gat NRL pilaia olsem Tom Dearden, Tesi Nius, na Cory Paix wantaim biknem pilaia Karmichael Hunt ol Hunters nemim sampela pilaia long resis wantaim ol.

Maski ol ki pilaia bilong Hunters i bin kisim bagarap na i no bin kisim fil long raun 7 tasol ol narapela Hunters i strongim bun na salensim ol ekpriens pilaia bilong Magpies inap 80 minits i pinis.

Dispela i bin strongpela salens namel long tupela tim insait long namba wan hap bilong gem taim hap taim skoa bilong tupela stap 12-10. Tasol las 18 minit i bin bilong ol Magpies i bin skorim 4-pela trai wantaim 3-pela trai bilong Broncos pilaia.

Kosa bilong Hunters Matt Church i tok sampela pilaia bai redi long kam bek long neks wik salens wantaim ol Redcliff Dolphins 29 Me bihain long ol malolo dispela wik.

Em i tok gutpela gem bilong South Logan bikos ol i bin mekim gut long planti sans bilong ol na pilai gut long 80 minits long winim dispela raun.

Hunters na Magpies i gat 3-4 lus win rekot maski Magpies sindaun long namba 8 ples na Hunters long namba 11 ples bikos long poin.

Ol Magpies bai trevol go daun long Rockhamton neks Sunday long bungim ol Capras long namba wan wiken bilong split-raun taim Hunters bai malolo long dispela wiken na pilai long 29 Me, wantaim Redcliff.

Jacklyn Kimala i raitim