Wanpela olpela ragbi lig klap bilong Pot Mosbi Ragbi Lig (PRL) kompetisen bai i kam bek long dispela yia wantaim strongpela luksave.

Galp West Ragbi Lig (GWRL) klap i kamap strong wantaim tupela nupela sponsasip long sapotim ol inap faivpela yia na ol i namba wan long peim registresen na afiliesen fi. Sponsa i givim pinis jesi long klap long pilai long dispela sisen.

Klap menesmen i invaitim ol pilaia insait long siti long kam joinim Anda 20 na mens na wimens A gret divisen.

Presiden Bobby Ako i tok olsem ol i lukluk long tupela ples bilong yusim olsem trening graun i go inap long kompetisen i stat.

Em i tok klap i toktok wantaim edministresen bilong Coronation na Bavaroko Praimeri school long yusim fil bilong ol olsem trening graun bilong klap.

Ako i tok klap i amamas long kisim tripela nupela set yunifom long tupela sponsa, Galp Isapea na Bige Petroleum Limited.

“Mipela i namba wan tim long baim rejistresen bilong ol pilaia na afiliesen fi bilong klap,” Ako i tok.

Em i tok klap i laik long selektim ol pilaia bes long ol trael mets tasol COVID-19 i pasim olgeta rot olsem na mipela i kisim ol pilaia tasol long lukluk na glasim ol lista bilong ol long pilai long dispela sisen.

Em i wanpela olpela klap bilong PRL kompetisen husat i kamapim ol biknem pilaia long 1970s olsem Tuksy Karu na ol Kouru famili.

Ako i tok ol i bin kamap las long sampela sisen na wantaim sapot bilong ol sponsa fokas bilong ol long dispela yia em long go insait long top 8.

“Wanpela hap bilong tingting bilong mipela long dispela sisen em mipela i lukluk na sekim ol pilaia long disaplin bilong ol,” em i tok.

Ako i tok amamas long SP Hunters pilaia Justin Rimbu long kamapim nem bilong klap na pilai pastaim wantaim GWRL klap i go inap long ol SP Hunters i luksave long em.

Joseph Dawai i raitim