PRK Mendi Muruks i bungim planti hevi tasol fainel 2021 skwat stap pinis long dispela yia Digicel Kap kompetisen,” Kepten bilong Muruks Weza Tenza i bin tokim Wantok Niuspepa.

“Mipela olgeta pilaia i redi long dispela sisen salens maski kain kain toktok kamap long sosel midia o olgeta kona tasol mipela ol pilaia i redi long takol long taim bilong en,”Mista Tenza i tok.

Em i tok long dispela yia sisen ol i gat kain kain pilaia bilong narapela provins tu i bin joinim klap i no ol Mendi pilaia tasol kamapim klap.

“Trening bilong mipela i go orait na nau mipela redi long pait long 2021 Digicel Kap kompetisen wantaim ol narapela Frensais klap wankain olsem mipela,” em i tok.

“Maski planti trening salens i bungim mipela tasol olgeta pilaia i gat tingting bilong gem na laikim ragbi lig long salensim ol yet,” em i tok.

Dispela hevi bilong COVID-19 i bin daunim mipela long trening na surukim taim bilong mipela long pilai tasol no gat wanpela pilaia i lusim klap na go. Sapos olgeta i stap wankain.

“Mipela i amamas long harim kain kain toktok bilong ol lain bikos em ol salens long laip bilong mipela olsem ragbi pilaia na klap wantaim na bildim tras namel long wan wan pilaia long bringim nem bilong klap go antap,” em i tok.

“Long divelopim klap o pilaia i save kam long gutpela lidasip skil na rilesensip namel long wan wan klap memba na opisal wantaim sapos no gat gutpela rilesensip o wanbel pasin em bai bagarapim tim spirit bilong gem,” Tenza i tok.

“Mipela olgeta i mas wok bung wantaim insait na ausait long fil long kisim gutpela kaikai bilong hamaspela mun trening mipela i bin wokim kam inap taim bilong gem,” em i tok.

Jacklyn Kimala i raitim