WANPELA bikpela ov sisen tonamen bilong kantri, Sauts Basketbal tonamen bai kamap long Goroka, Isten Hailens provins.

Ol i makim Isten Hailens provinsal kapital bilong hostim Nesenel Sauts Basketbal Lig bihain long ol i bin hostim tonamen long Lae, Morobe provins long 2019.

Las yia 2020 ol i no bin pilai bikos long COVID-19 ristriksen i bin distebim NSBL tonamen. NSBL Petron Johnny Yawari i tokim wanpela midia konfrens long Hilton Hotel long Pot Mosbi olsem tonamen bai go het long dispela yia.

Mista Yawari i tok em i raitim pas i go pinis long kontrola long tok orait long tonamen i mas kamap na ol i wet tasol long harim bekim bilong kontrola.

Em i tok NSBL i bin stat long 2008 na em i wanpela bilong ol grasrut level tonamen we planti ol yut i save pilai. Basketbal i save bringim Sauten Hailans na Hela provins long kam bung wantaim long pilai olsem ol prens.

Em i tok NSBL i gat histori we i save senisim ol yut i no long basketbal yet tasol long ol narapela spot olsem soka na ragbi lig.

Dispela kompetisen tu i save mekim planti ol lokol bisnis bilong komyuniti i save kisim biknem na em i save bringim ol politikal lida long sapot, wok na stap klostu long ol pipel.

“Mi bin bukim na redi long tonamen bai kamap long 1 i go long 4 Julai long Goroka sapos kontrola na PNG Spots Faundesen i aprovim tonamen long go het em bai orait,” em i tok.

Mista Yawari i tok tenkyu long Mineral Risos Divelopmen Kampani long sapotim 2019 tonamen long Lae na em i bilip olsem MRDC bai helpim ol gen long dispela yia.

Joseph Dawai i raitim