MONI Plus Pot Mosbi Vipers i bin opim 2021 sisen salens bilong klap long las wik  Fonde.

Dispela bung bilong Vipers klap i bin bungim olgeta sponsa, wokmanmeri bilong klap wantaim Tim Menesa, kosa, dokta na olgeta pilaia bilong tim.

Siti Menesa Bernard Kipit i salensim olgeta pilaia wantaim ol klap memba long sanap strong long tupela lek na yusim han na het long bringim gutpela histori bek long NCD bikos olgeta pipel bilong NCD i stap beksait long sapot.

Em i tok olgeta pilaia i mas pilai strong, seif na klin gem long putim rekot insait long NCD long nau na bihain taim tu.

Dispela em bikpela salens bilong olgeta pilaia nau long klap long wanem planti hevi stap long bagarapim dispela gem spirit tasol wan wan pilaia i mas soim trupela kala bilong klap na ol sponsa.

“Mi amamas long joinim Vipers klap na pilai wantaim ol bihain long 2-pela yia mi bin go skul na stap,” Wanpela pilaia bilong Vipers Abel Rami i tok.

Rami i bin pilai wantaim PRK Mendi Muruks long 2018 na 2019 em bin go skul na pinis long las yia inap nau ol Vipers kisim em long joinim klap.

“Mi redi long salensim ol Muruks gen bikos ol ples klap bilong mi tasol nau mi bilong Vipers klap na bai mi luk fowat long mekim klap bilong mi amamas long insait na ausait wantaim,” em i tok.

Olgeta Vipers pilaia i bin redi long kam bek gen olsem wanpela famili na luk fowat long 2021 sisen olsem salens yia bilong ol bikos long hevi bilong COVID-19.

Long wankain taim Dokta bilong klap Newton Albert i bin givim sampela ol helt toktok long ol pilaia long luksave na bihainim long taim bilong COVID-19 wantaim ol stia tok bilong strongim na sapotim ol nupela na olpela pilaia wantaim.

Jacklyn Kimala i raitim