PAPUA Niugini Nesenel Ragbi Lig Kompetisen na Digicel Kap kompetisen bai kik ov long dispela wik Sarere Mei 8, 2021 bihain long ol i bin kisim tok orait long Pendamik Kontrola Opis long las wik Frade 30, 2021.

CEO bilong PNGRFL Stanley Hondina i bin mekim dispela stetmen bihainim ol lain wantaim ol Pendamik Kontrola David Manning.

“Long trinde Epril 28, 2021 mipela i bin kisim tok orait kam long Kontrola long tupela rot- 1) Bilong olgeta tim long beis insait long wanpela siti o senta na pilai olgeta gem long wanpela hap bai no gat planti keis na 2) ranim ol kompetisen long tupela siti o senta bai no gat sapota inap COVDID-19 go daun,” Hondina i tok.

“Mipela i bin givim ansa long las wik Fonde Epril 29, 2021 olsem PNGNRLC i makim namba tu rot kam na bin askim ol lain long andastend na tok orait long ol protokol we ol kompetisen bai pilai long en.”

Hondina i tok fomal tok orait i bin kam long statim dispela primia kompetisen long Sarere Mei 8,2021 na Sande Mei 9, 2021 long Pot Mosbi na Lae long Sande Mei 9, 2021 aninit long strongpela ol banis protokol.

Long ol neks faivpela gem bai ol pilai long Pot Mosbi na Lae wantaim no gat sapota,” Hondina i tok.

“Riviu bai kamap long no gat sapota polisi na surukim ol kompetisen i go long ol arapela senta.”

“Mi askim olgeta frensais bilong mipela na ol pilaia na kosa wokmanmeri na menesmen long bihainim gut ol banis protokol,” Hondina i tok.

“Mipela i gat gutpela sisen long 2021 na dispela yia tu mipela i mas strongim ol banis protokol long pinisim dispela Digicel Kap kompetisen wantaim gutpela ripot.”

Em i tok bikpela tenkyu long Kontrola David Manning Dokta Daoni Esorom na wokmanmeri long tok orait.

Na tu bikpela tenkyu long neming raits sponsa Digicel wantaim SP Brewery na Motor Vehicle Indurens Ltd long sapot bilong ol.

Olgeta Pot Mosbi mets bai kam laip long TV taim ol stretim ol gem long Lae bai kam laip bihain long wan o tu de leit,” em i tok.

Em i tok olgeta dro i kam aut pinis na redi long statim sisen wantaim ol strongpela banis protokol.