TUPELA De woksop bilong ol kosa na referi bilong 2021 Digicel Kap kompetisen i bin kamap long las wik long Pot Mosbi.

CEO bilong PNGRFL Stanley Hondina i tok het tok bilong dispela woksop em ‘Impruving Standet’ bilong ol 12 Digicel Kap Frensais na ol referi.

Kosa bilong PNG LNG Kumuls Michael Marum i bin go pas long dispela woksap  we ol i toktok long het tok wok bilong kosa na wokmanmeri bilong medikol i go long banis protokol,” Hondina i tok.

Long de tu woksap i bin toktok long medikol sait bilong ol pilaia na kosa insait na ausait long fil wantaim na tu long wanem kain ol kosa na trena i mas bihainim taim wanpela pilaia i kisim bagarap insait long fil.

Dispela woksap i bin toktok long wanem ol samting ol kosa, trena na wokmanmeri i ken mekim long frensais bilong ol tasol bikpela samting em long eksasaisim dispela veliu i kam long primia kompetisen long afiliet lig wantaim ol meri na Anda 20 na ol junia long skul,” Hondina i tok.

As tingting bilong dispela em long impruvim domestik standet bilong mipela long olgeta level.”

Bihain long dispela tupela de woksop 2021 Digicel Kap kompetisen bai stat long dispela wiken bihainim tok orait bilong kontrola wantaim olgeta COVID-19 banis protokol.

Olgeta referi i bin bung wantaim kosa bilong 12 Frensais klap na toktok moa long lo bilong gem bikos planti hevi i save kamap taim referi i no lukim wanpela rong insait long fil.

Dispela tupela de woksop i bin pinis gut wantaim planti askim na ansa namel long kosa na referi wantaim helpim na sapot bilong Kosa Marum.

Jacklyn Kimala i raitim