DIGICEL i surukim neming raits sponsasip bilong 2-pela yia moa olsem neming raits sponsa bilong Nesenel Ragbi Lig kompetisen, Digicel Kap long las wik Trinde i tok.

Sinia Vais Presiden bilong Digicel PNG na Dairekta bilong PNGNRLC Lorna McPherson i tokaut klia long K3 milien sponsasip bilong Digicel em bilong surukim wok bilong Nesenel Ragbi Lig kompetisen inap tupela yia.

Siaman bilong PNGNRLC Adrian Chow i tokaut long strongpela 11 yia rilesensip namel long Digicel long kam olsem neming raits sponsa na sapotim Nesenel Ragbi Lig kompetisen long taim bilong COVID-19 pandemik.

Long wankain taim dispela i ken apim veliu bilong ragbi lig long yusim pletfom bilong komyuniket gut wantaim sosel, ikonomik na kalsaral rot long gro.

“Mi bilip olsem rilesesensip bilong mipela wantaim Digicel bai go yet wantaim Primia Nesenel Spot kompetisen na groim kompetisen long neks 2-pela yia,” Chow i tok.

CEO bilong PNGRFL Stanley Hondina i tokaut klia olsem klostu taim 2021 Digicel Kap kompetisen bai stat maski COVID-19 pandemik  i daunim olgeta plen tasol Digicel i strongim sponsasip bilong en insait long Nesenel Ragbi Lig kompetisen.

Em i tok bikpela tenkyu long Digicel i kam insait long sapotim spots na tu olgeta COVID-19 protokol mesa taim sisen i stat.

Hondina i tokaut long bikpela wok bilong Digicel insait long kantri bikos ol i save sapotim ol lokal lig tu, olsem Hunters na Kumuls wantaim.

Digicel opim bikpela rot bilong ragbi lig kompetisen long mak bilong grasrut i go antap long Kumuls bikos long strongpela sapot.

Jacklyn Kimala i raitim