RABAUL Panthers i bin namba wan long tupela klap long kisim yunifom bilong ol long Kokopo Mini Siti Lig las wik.

Rapopo Beach Resort Kokopo (Vunatung Plantesin) na Sanctuary Hotel i bin sponsa long ol yunifom bilong tupela Ragbi Lig kompetisen long Kokopo na Pot Mosbi aninit long lidasip bilong tupela biknem Kumuls pilaia Richard Wagambie na Michael Marum.

Kosa bilong PNG Kumul Michael Marum husat i go pas long lukautim dispela Kokopo Siti Lig i tok tenkyu long James Peng bilong Sanctuary Hotel na Vunatung Plantesin Grup long kam long bod na sapotim ol wantaim yunifom wankain olsem ol Paga Panthers long PRL.

Rabaul Panthers i kisim 3-pela yunifom bilong ol Anda 21, sinia man na meri wankain long ol Paga Panthers long Pot Mosbi.

Peng i tokaut olsem ol bai go het long sapotim tupela tim Rabaul Panthers na Paga Panthers long  trevol go long Rabaul na Mosbi long resis wantaim.

Mista Wagambie i tok tenkyu long James Peng na Grup bilong kampani bilong em long sponsasip long kamapim kwaliti pilaia i go insait long sistem bilong Kumuls, Hunters na Digicel Kap.

Siaman bilong PNGRFL Sandi Tsaka i tok sapot long grasrut level bilong gem em bikpela samting long impruvim gem standet na groim gem i go antap long Digicel Kap, Hunters na Kumul level.

Moa long 100, 000 pikinini i pilai long grasrut mak em antap long Digicel Kap, Hunters na Kumuls mak olsem na dispela kain sapot em bikpela samting long groim gem insait long kantri.

Jacklyn Kimala i raitim