DIVELOPMEN bilong spot long grasrut level em namba wan rot bilong bringim olgeta spot kod go antap long nesenel na intenesenel level.

Dispela kain divelopmen i ken kamapim senis insait long wan wan komyuniti, klen, provins na kantri wantaim bilong wanem grasrut level i save  gat moa long ol yangpela talen pilaia bilong olgeta spot kod we olgeta i nidim sponsasip sapot.

Long lukautim wanpela grasrut klap i no isi wok long painim sponsasip tasol dispela em bikpela salens long olgeta spot kod long kantri.

Bikpela eksampel em ragbi lig long kantri long grasrut level, no gat gutpela sponsa na sapot long wan wan komyuniti o provins long bringim go antap long nesenel na intensenel level. Tasol i gat sampela klap insait long wan wan eria i gat gutpela sapot bilong husat i go pas na lukautim olsem praivet klap bilong ol.

Long Nesenel level em Digicel Kap we 40 man skwat i stap insait, long Hunters em 30 man skwat tasol na Kumuls em 17 man skwat na Okids meri taim moa long tausen i hatwok long wan wan ples bilong ol long kam antap long dispela kain mak.

Olsem na namba wan rot bilong kwaliti divelopmen bilong ol spot kod long bringim ol kam antap em long grasrut level.

Wok bilong lukautim spot long grasrut level em bikpela samting long taim bilong askim sponsasip bilong klap wantaim ol arapela nid bilong ol etlit long surukim spot wok tasol sapos i gat gutpela sponsa em laki.

Long kantri nau i gat bikpela salens long grasrut level bikos planti gutpela etlit i no gat gutpela sapot na sponsa olsem na i save givim bikpela hatwok long olgeta klap na elit long kantri go het wantaim wok.

Spot em namba wan rot bilong kantri divelopmen bikos yumi gat planti sitisen i no gat gutpela kwalifikesen long painim wok na tu long sapotim nid bilong ol insait long famili na komyuniti wantaim.

Planti bilong Tim PNG husat i makim PNG long nesenel na intenesenel level i no gat gutpela edukesen tasol talen bilong ol i putim ol antap long mep na tu helpim ol long edukesen sait.

Jacklyn Kimala i raitim