Maunten M Dragons tim bai go pas long sisen 2021 long Kimil Ragbi Lig fil long Jiwaka provins na kisim sapot long ol lokal elit bilong ol.

Dispela bai kamap bihain long wanpela polisman Simon Kom i givim ful yunifom long tim opisal long trening fil long Waghi Sekenderi skul graun long las wik Sande.

Mista Kom i givim K100 wantaim long ol yangpela pilaia long treining strong na kamap gutpela sitisen bilong kantri.

“Mipela i laikim olsem ol yangpela man tu i mas bung wantaim long 1 kaunsil wot mas senis bikos planti pipel i tok olsem mipela ol trabel lain tasol nau mipela bai senisim dispela pes kamap trupela kala,” Kom i tok.

Narapela saveman na loiya Felix Kints i bin mekim promis long givim K1000 gen long tim.

Em i tokim ol yuts long komitim ol yet long gem na lusim pasin bilong spak brus, stil na ol kainkain hambak pasin we bai i bagarapim laip bilong ol.

Sinia pilaia Wesley Karap i tok tenkyu long tupela sponsa na i promis olsem ol pilaia bai disaplinim ol yet na winim ol gems.

"Mipela nogat wanpela sponsa. Mipela i gat planti pilaia i stap nating long komyuniti so mipela kamapim tim long ol i ken pilai na senisim laip bilong ol."

Mista Karap i pasim tok tenkyu tu i go long Kimil lig presiden Michael Tee Pau na lig ekseketiv long tok orait long tim i ken apiliet na kamap wanpela klab long sisen 2021.

HOFFMAN GULGARYE i Raitim