BIKPELA memori resis i bin kamap gen namel long SP PNG Hunters wantaim Sunshine Coast Falcons long las wik Sarere long Boycroft oval long Gold Coast.

Dispela resis  namel long tupela tim i bin makim bikpela mets insait long histori bilong Intrust Super Kap long 2017 taim tupela Hunters biknem pilaia Wartovo Puara Jnr na Adex Wera husat i bin joinim bun long daunim Falcons 12-10.

Long dispela raun 4 bilong 2021 Intrust Super Kap Wera i no joinim tim tasol Wartovo strongim ol sampela yangpela pilaia long muv fowat long neks level bihain long ol i bin autim Falcons wantaim 32-12. Dispela memori long trael resis bai kamap tupela taim namel long Hunters na Falcons long dispela sisen.

Kosa bilong Hunters Matt Church i tokaut long bikpela ekspriens  pilaia Wartovo husat i save amamas long serim histori wantaim ol sampela yangpela pilaia husat i joinim klap long dispela sisen long go het wantaim trening insait na ausait wantaim long fil.

“Falcons em strongpela tim husat i bin daunim Ipwich Jets wantaim ol South Slogans long raun 3 bilong Intrust Super Kap tasol ol i bin go daun long PNG Hunters long raun 4,” Church i tok.

Hunters yusim bikpela strong bilong ol long autim Falcons na luk fowat long ol arapela raun bai kamap long dispela sisen. Maski sampela yangpela pilaia joinim tim tasol ol ekspriens pilaia i strongim ol insait long fil long winim gem.

Dispela salens i no pinis inap ol bungim Falcons namba tu taim gen long neks raun bilong sisen we bai kamap bihain long olgeta salens.

Olsem na olgeta Hunters i redi stap long ol arapela salens na long bungim Falcons namba tu taim we dispela bai i bai wanpela strongpela gem kamap namel long tupela bikos Falcons bai tingting long bekim 32-12 win taim Hunters laik strongpim histori insait long Intrust Super Kap sisen.

Jacklyn Kimala i raitim