Tripela sinia wimens basketbal pilaia bai greduet long Istitut ov Bisnis Stadi (IBS) bihainim spots divelopmen program bilong Basketbal Federesen ov Papua Niugini (BFPNG).

BFPNG i tok amamas long ol dispela tripela meri husat bai greduet wantaim setifiket bilong komes. Ol dispela sinia wimens basketbal pilaia em; Symona Gesa, Betty Angula na Denienne Bray.

BFPNG bod i bin traim hat long stretim rot bilong ol dispela pilaia na nau ol bai greduet long fil bilong komes.

Wanpela stetmen bilong BFPNG i tok dispela em i wanpela plen bilong mekim basketbal i gro insait long kantri.

“Long dispela yia 2021, ol i gat Cornelius Muri na Rosa Kairi long go long wankain skul olsem ol dispela tripela meri.

“BFPNG i laik tok tenkyu long PNG Olimpik Komiti (PNGOC) na IBS long givim dispela sans long helpim ol etletik long kisim kain pepa olsem bilong helpim ol klap na asosiesen level o long painim wok long helpim famili bilong ol,” BFPNG ripot i tok.

PNG  nesenel sinia wimens pilaia Betty Angula husat bai greduet wantaim setifiket bilong human risos menesmen i tok em i gat wanpela moa semesta long pinisim stadi bilong em pastaim long em i greduet.

“Dispela setifiket, mipela bai kisim em bai inap helpim mipela long klap na asosiesen level na tu long taim tim i trevol ovasis.

“Wanpela bikpela samting tu em long bihain taim mipela i ritaia bai nogat wok long mipela olsem planti ol nesenel pilaia i wok long salim buai na smok long strit. Olsem na dispela pepa bai inap helpim mipela kisim wok na helpim famili bilong mipela,” em i tok.

Em i tok tenkyu long BFPNF na PNGOC long mekim dispela rot long helpim driman bilong mipela long balesim spot na edukesen aninit long spots divelopmen program.

Joseph Dawai i raitim