TOP sprinta bilong PNG Leroy Kamau i bin go long Yunaitet Stet long dispela wik Mande long resis long sampela kompetisen.

 Em sapos long trevol go long Australia dispela yia tasol rot bilong balus i bin pas bikos long COVID-19 olsem na ol Etletik PNG i bin salim Kamau long go olsem long USA we boda bilong ol i stap op long ol lain husat i laik trevol long olgeta kantri.

Kamau em top man sprinta bilong PNG na i bin stap wankain long 100m, 200m na 400m long Nesenel Sempiansip long Pot Mosbi long las yia Disemba.

“Leroy i stap long gutpela fom bihain long trening wantaim Nelson Stone moa long wanpela yia na mipela laik lukim wanem em i ken mekim taim em go soim em yet long sampela kwaliti kompetisen,” Presiden bilong Etletik PNG Tony Green i tok.

I gat planti gutpela trek long bungim ol long California na Texas neks mun na long Jun na mipela laikim olsem Leroy bai stap long USA inap tupela mun. Kompetisen skeduel bilong em ol stretim yet tasol mipela i salim em nau long givim em inapt aim long go stap lukim ples na redi long dispela resis.

Long Wes Nu Briten Etletik Sempiansip long Novemba 2020 Kamau i bin pinis long 21.15 seken taim insait long 200m resis bilong ol. Dispela i bin brukim rekot bilong PNG man long ran.

Long putim dispela pefomens long sait mipela i ken lukluk long PNG All Taim namba wan pefomens lis we i save soim olsem long 60 yia histori bilong Etletik PNG, Theo Piniau em wanpela nesenel rekot holda bilong (20.97) na Nelson Stone (21.09) i bin ran pas long taim.

Theo i bin kisim dispela taim bihain long tripela yia long Yunaitet Stet long skolasip na Nelson tu i bin wok wankain olsem long trening na kompetisen long Australia. Maski Leroy i bin makim PNG long Oceania Anda 20 Sempiansip long 2017 dispela i bin wanpela ekpriens long makim PNG. Bihain long lusim spot long fainel yia bilong skul bilong em long 2018 em bin go bek long trek long namba tu hap bilong 2019 na i bin trening aninit long lukaut bilong Nelson Stone.

Leroy i bin bihainim dispela wankain rot pefomens long go pas long olgeta sprinta etlit long Kimbe long Nesenel Sempiansip long Pot Mosbi tripela wik bihain.