PAPUA Niugini Primia Mens Baskebal Lig (PMBL) kompetisen i bin stop bikos long coronavirus pandemik.

PMBL Siaman Alain Boussoungou i tok kompetisen i bin laik stat long dispela mun Epril tasol hevi i kamap long ristriksen mesa bilong COVID-19 pandemik.

Boussoungou i tok ekspresen ov interes leta ol i salim i go aut long ol klap long stat bilong dispela yia tasol tupela klap tasol i soim interes bilong ol.

“I tru olsem COVID-19 pandemik mesa i givim hevi long olgeta pipel wantaim olgeta spot long kantri tasol praioriti em sefti bilong ol pilaia na ol pipel long taim bilong gem olsem na bai mipela pasim olgeta spots ektiviti i go inap long taim olgeta samting i go bek nomol pastaim,” Boussoungou i tok.

Em i tok dispela bai givim inap taim long ol klap long redim ol yet na stretim ol tim gut. Boussoungou i tok aut tu olsem ol i bai bringim dispela kompetisen i go long Lae long dispela yia 2021.

“Basketbal em i nesenel spot na ol i save pilai long olgeta hap bilong kantri, tasol long ol viles i nogat ol kain spot olsem i stap bikos i nogat ol kain kompetisen olsem PMBL i stap long ol provinsal senta bilong ol, ” em i tok.

Em i tok PMBL em i wanpela semi-profesenel kompetisen long kantri na em i gutpela long lukim ol narapela senta pilaia i kam pilai long dispela level long traim painim standet bilong Pot Mosbi.

Boussoungou em i wanpela nesenel selekta na em i ting PMBL i ken go het long bringim ol tim long ausait senta long pilai long dispela kompetisen.

“Yu mas salensim ol gutpela pilaia long impruvim level bilong gem bilong yu. Mi lukim olsem i gat planti talen long taun na rurel eria tasol ol i no kam aut yet,” em i tok.

Boussougou i tok em gutpela long surukim taim bilong PMBL sisen long ol tim bai i gat inap taim long ekspresen ov interes leta i kam long ol i ken kamap memba bilong PMBL.

“Nau yet, mipela i gat Southern Flames na Moni Plus i i bin tok olsem bai ol i kam pilai long PMBL tasol ol narapela i no toktok yet long bai ol i kam o nogat,” Boussoungou i tok.

Em i tok i nogat wanpela deit long dispela kompetisen bai stat tasol em bai stat taim olgeta samting i kam bek nomol.

“Ol i givim yumi wanpela mun long lokdaun olsem na taim dispela i klia na orait bai yumi inap statim pri-sisen na kik ov wantaim propa-sisen,” PMBL siaman i tok.

Joseph Dawai i raitim