TUPELA bikpela spoting senta bilong Pot Mosbi em Taurama Akwatik Indo Stedium na Rita Flynn wantaim i pas bikos tupela nau i kamap haus sik bilong COVID-19.

Namba bilong COVID-19 long Pot Mosbi e mi go antap hariap tru long las tripela mun na bikpela Pot Mosbi Jeneral Haus Sik i no inap holim olgeta.

Ol i yusim dispela tupela bikpela senta long lukautim ol COVID-19 sikmanmeri. Insait ol i gat ol medikol ikwipmen long was long sik man, meri o pikinini.

Long TAIC ol spotsmanmeri na etlit i save pilai volibal, basketbal, netbal na swiming o jim na eksesais. Dispela ol ektiviti i stop taim senta i stat kisim ol sikmanmeri bilong COVID-19. Ol wan wan etlit nau i go het long ol trening bilong ol ausait long tupela senta.

Long Rita Flynn Kot ol i save pilai netbal tasol dispela spot kod tu i  stop.

Presiden bilong Pot Mosbi Netbal Asosiesen Linda Ligo husat i bin wok strong long bringim dispela sisen i go antap long neks level i tok olsem COVID-19 lokdaun long las yia 2020 kam na nau 2021 i bagarapim olgeta plen bilong 2021 tasol ol bai wok strong long dispela sisen.

“Mipela bai yusim Sir John Guise Indoor Stedium tasol no gat gutpela spoting fesiliti bilong yusim long trening o pilai wantaim olsem na mipela wetim tok orait bilong gavman long givim mipela bek Rita Flynn o baim moa spot fesiliti bilong yusim,” Presiden Ligo i tok.

“Mi laik tok tenkyu long Motu Koita Wes Netbal Asosiesen long holim kompetisen na pinisim gut wantaim gren fainel bikos dispela i ken helpim na strongim fitnes bilong ol sampela namba wan PNG netbal etlit long go het wantaim gem,” em i tok.

Bikpela salens long ol helt dipatmen nau long wokim moa haus sik na inapim wantaim ol ikwipmen long taim bilong pandemic.

Jacklyn Kimala i raitim