Wok redi bilong Olimpik gem long Tokyo, Japan long Julai i go het tasol nupela Covid-19 keis i wok long antap i bin stopim ol PNG Weitlifting tim long stap bek long kantri.

I bin i gat plen long ol weitlifting tim long i go stap na trening long Melbourne, Australia aninit kosa Paul Coffa tasol dispela plen bai i no inap kamap bikos long trevol ristriksen.

Ol bai i nogat narapela rot tasol ol weitlifta bai i stap na stat trening long Nesenel Spots Institut (NSI) long Goroka, maski em i no orait tumas long ol.

PNG Osenia Komiti (PNGOC) Sekreteri Jeneral Aurita Rapila i tokim midia olsem PNGOC  bai helpim long stretim ples bilong ol long Goroka olsem trening hap bilong ol weitlifta.

Rapila i tok ol nau wet long edvais bilong Intanesenel Weitlifting Federesen (IWF) na Intanesenel Olimpik Komiti (IOC) long helpim ol i kwalifai long kompetisen.

“PNGOC bai edvaisim ol etletik long bai ol inap trevol i go long Australia o stap long NSI na trening long hap,” em i tok.

Long las wik narapela toktok i kamap long maus bilong kosa Paul Coffa olsem Dika Toua na Morea Baru i ken pilai long Tokyo Olimpik gem long Julai 2021 maski Osenia Rijinol Kwalifaia i no tok orait yet.

“Toktok bilong Osenia Kwalifaia i no inap pasim Toua na Baru bikos ol i gat mak bilong weit klas long intanesenel weitlifting federesen kotinetel poin sistem.

“Kontinetel poin kwalifaia i lukim pinis olsem tupela Baru (Mens 61kg) na Toua (wimens 49kg) i gat mak long sampela ol etletik long weit klas bilong Osenia.

“Toua na Baru i gat bodi weit inap long ol i pilai,” Coffa i tok.

Em i tok tu olsem sans bilong ol narapela weitlifta i wankain na disisen bilong ol i stap long han bilong IWF na IOC.

PNGOC bai wok klostu wantaim ol long intanesenel trevol na traim helpim weitlifting tim long redi long Olimpik gem.

Joseph Dawai i raitim