PAPUA Niugini bai putim histori long Taitel Pait we bai kamap long Epril 23, 2021 na bai ranim 6-pela Kad Bouts, 2-pela Intenesenel Taitel WBA-ASIA Super Featherweight Sempian pait aninit long 59 kg wantaim bikpela sapot bilong Oceania Fighting Promosen (OFP).

Dispela Taitel pait bai kamap namel long Laitweight boksa sempian bilong PNG Junia Raka na Roldan Aldea bilong Pilipins long lukim husat strongpela boksa bai pairapim nem pas long nupela Belt stap nating na no gat nem long en.

Menesing Dairekta bilong OFP Maryanne Millie i amamas long tokaut long dispela Taitel Pait long go het bihain long ol i bin wet  inap 1 yia na 4-pela mun olgeta bikos long COVID-19.

“Mipela i amamas long holim dispela bikpela taitel pait aninit long 59 kg na long kisim WBA-ASIA pait,” Millie i tok.

Em i tok dispela Filipino boksa bai kamap long ples balus long dispela wik Fraide 9 Epril, 2021 na stap tupela wik long kwarentin pastaim long boksen.

Em i tok olgeta COVID-19 Protokol i stap pinis na ol bai bihainim long holim dispela taitel pait.

“Mi laik salensim olgeta boksa long sanap strong na makim kantri bilong mipela na tu bikpela stret go long Junia Raka husat i stap 300 long wol bai pait wantaim Filipino wol boksa,” em i tok.

“Mipela laik salensim Raka mas pait strong na putim kantri bilong mipela long wol mep wantaim olgeta talen insait long wan wan boksa bilong PNG,” Millie i tok.

 Singaut long olgeta PNG i mas sapotim Raka husat bai pait long mak bilong wol long pait wantaim ol Philipines na sapos em winim dispela taitel pait em bai gat sans long go het na pait wantaim ol wol sempian long olgeta bilong wol.

Jacklyn Kimala i raitim