DISPELA nominesen bilong ol 2021 Spot Awot bai pas klostu taim na Ogenaisesen Komiti i askim ol pablik long salim ol nominesen fom bilong ol hariap bipo long Epril 7.

Siameri bilong ol SPSA Ogenaisesen Komiti Nancy Gah i tok long taim ol i opim dispela SP Spot long Februeri nominesen i stat long kam insait.

“Mipela i bin kisim ol nominesen bilong Pot Mosbi tasol. Mipela i laikim olgeta pablik wantaim ol etlit nan-gavman ogenaisesen husat i save go pas long ol spot insait long ol provins tu i mas salim nominesen bilong ol. Dispela SP Spot Awots em bilong olgeta PNG spot tim na ol etlit.” Gah i tok.

“Ol Awot em bilong mekim ol etlit long kamap moa gutpela. Tasol mipela tu i gat bilong ol midia, ol NGO i save joinim ol spot, ol etlit stat wantaim disabiliti na ol hatwok spot edministreta na kosa.

“Mipela i no ken lusting olsem  spot i save pilai bikpela wok long ol komyuniti bilong mipela. Bikos long spot olsem na mipela putim PNG long Wol mep. Spot i save bungim yumi olgeta pipel wan olsem na dispela yia het-tok em ‘Excellence through Adversity’ .

Ol SPSA Ogenaisesing Komiti i kolim ol Spot federesen, klap, ol midia na jenerel pablik long salim nominesen go hariap.

Ol 12-pela grup bilong Awots;

1. People’s Choice Awot
2. Man Etlit bilong yia
3. Meri Etlit bilong Yia
4. Tim bilong Yia
5. Nesenel Pefomens bilong Yia
6. Komyuniti Spot Initiative
7. Junia Man Etlit bilong Yia
8. Junia Meri Etlit bilong Yia
9. Best Spotmanmeri wantaim Disabiliti
10. Spot Opisal bilong Yia
11. Spot Poto bilong Yia
12. Stan Joyce Awot

“Mi laik tok klia olsem dispela grup awot i bin stat long 2019. Em Stan Joyce Awot. Dispela Stan Joyce Awot bai go long husat ogenaisen i save givim ful autstending sapot wantaim patnasip na wok bung wantaim spot long PNG. Dispela awot bai go long kompret kampani long makim;

1. Longevity
2. Creativity
3. Impact in the Community na
4. Achievement

“Olgeta nominesen bai pas long Epril 7 2021.

Ol nominesen fom i stap long SP Brewery opis (Pot Mosbi, Lae, Goroka, na Kokopo), PNG Spot Faundesen Opis, Sir John Guise Indoor Komplex na PNG Olimpik Opis long Lahara Drive Boroko o kisim long PNG Olimpik websait www.pngolympic.org