SP PNG Hunters i gat planti moa wok i stap bihain long ol i bin setim bikpela rekot long daunim  Ipswich Jets  44-22 long las wik Sarere long Bycroft Gold Coast.

Maski wantaim sampela keis bilong COVID-19 long Brisbane tasol ol PNG Hunters i bin yusim olgeta protokol bilong COVID-19 long bekim lus bilong ol long raun 1 mets wantaim Seagulls.

Dispela em histori bilong Hunters long pilai hariap wantaim bal na putim moa trai bihainim wankain lain ap bilong las wiken gem.

Bikpela senis long olgeta pilaia long raun 2 bekim bilong raun 1 lus we dispela i soim long taim ol i bin mekim planti bek pas na pilaim bal long taim bilong takol.

“Mi amamas long olgeta pilaia bikos ol wok hat tru long pulapim tingting bilong ol taim Ipswich Jets i bin kisim sampela skoa pas long mipela, tasol ol pilaia i bin yusim het long abrusim Jets wantaim guria poin,” kosa Matt Church i tok.

Olgeta pilaia i bildim ol gut bihain long hap taim long go insait na daunim Jets wantaim bikpela skoa 44-22.

SP Hunters bai malolo tupela wik taim Intrust Super Cup i kisim malolo long Ista wiken bihain long ol bai go daun Not long salensim ol Mackay Cutters long raun 3.

Ol i gat sampela moa mun bilong sisen long stretim ol yet na redi long neks blok bilong ol gem.

Olsem na insait long tupela wik Hunters pilaia i gat bikpela wok i stap long mekim na kam bek wankain olsem dispela raun 2 win.

Jacklyn Kimala i raitim