SP PNG Hunters i bin statim Raun 1 bilong 2021 Intrust Super Cup wantaim gutpela poin long las wik Sarere long hom gem bilong Hunters long Gold Coast.

Dispela em soim gutpela piksa bilong ol bihain long 14 de kwarentin aninit long lidasip bilong kepten na strongpela 13 lok Ila Alu wantaim Vais kepten Keven Apo na sapot bilong ol arapela sinia pilaia olsem Wartovo Puara Junia, Watson Boas i bin mekim ol kisim gutpela skoa mak long las minit.

Wynn Manly Seagulls tim i bin kisim gutpela taim long opim gem wantaim namba wan trai long namba wan hap tasol kik bilong ol i bin abrus na putim skoa long 4-0.

Kepten bilong Hunters Ila Alu yusim fowat strong bilong em long abrusim 10 mita lain tasol i asua na givim bal hariap long hap bek na givim sans long Seagulls long skorim narapela trai gen na apim skoa bilong ol 16-0.

Hunters strongim difens bilong ol inap nupela pilaia Jokedi Bire bilong Lae Snax Tigers i bin bekim olsem namba wan rekot long opim 2021 Intrust Super Cup na tu olsem nupela pilaia bilong Hunters long skorim namba wan trai.

Bihain long Bire, fulbek Terry Wapi i bin saitim ol Seagulls pilaia na skorim namba tu trai, wantaim gutpela kik bilong Charlie Simon bringim skoa go antap long 12-18.

Long wankain taim Seagulls i bin kisim 2-pela penalti poin na apim skoa i go antap 20-12 tasol Hunters i bin bekim gen wantaim namba tri trai bringim skoa i go antap long 18-20 inap ful taim.

Dispela em namba wan hom gem bilong PNG Hunters long Gold Coast wantaim planti PNG sapota werim ol PNG kala klos na apim plak go antap taim tupela tim i bin resis.

Olsem na kosa Matt Church i makim wankain 17 man skwat husat i bin pilaia las wiken long pilai gen long dispela wiken raun 2 salens wantaim Ipswich Jets long Bycroft.

Jacklyn Kimala i raitim