WANPELA Lokal referi bilong Digicel Kap kompetisen Raynoll Alphones i bin tokaut klia long tupela kepten bilong tupela mein gem namel long Rainbow Tribes na Top Street Hawks long las wik Sande long Kone Tigers.

Dispela Morata kompetisen i save stat gut tasol taim bilong fainel i save gat hevi namel long ol pilaia na referi insait long fil long taim bilong gem.

Bikpela gol bilong dispela yia em long senisim sampela pasin bilong sisen salens na traim wok strong long divelopim tingting bilong ol pilaia insait na ausait long fil bikos dsipela ol rot bilong redim ol long PNG Games na Pasifik Gems na go moa long narapela mak.

Wanpela referi bilong Digicel Kap kompetisen Raynoll Alphones i tokim tupela kepten long harem tok bilong referi na bihainim insait long fil na no ken pilai no gut gem bilong bringim hevi namel long referi na pilaia.

“Taim referi winim wisel na mekim wanem disisen insait long fil tupela tim i mas wanbel na pilai bikos referi i gat pawa long taim bilong gem.”

Long namba wan hap bilong kwata fainel gem bilong tupela mein gem tupela tim i bin pilai gut wantaim wankain skoa inap long hap taim. Bihain long hap taim na tim go pas wantaim bikpela skoa i laik holim referi na referi lusim fil na go ausait.

Long nau bikpela salens bilong Morata Off-sisen kompetisen i mas bihainim tok bilong referi na lains man long pinisim kompetisen gut wantaim gutpela eksampel na kamap gutpela pilaia bilong kompetisen.

Olgeta klap i mas gat rispektim ol wan wan na daunim ol yet long fil na gat disiplin long soim piksa bilong klap.

Jacklyn Kimala i raitim