OL Etletiks PNG bilong Kerowagi distens trening skwat long dispela World Cross Country Championships na Pacifik Mini Games neks yia i bin holim namba wan kompetisen bilong ol long las wiken long NSI long Goroka.

Ol etlits i redi gut na luk fowat long dispela namba wan raun bilong ol aut long taun bihain long tripela mun bilong strongpela trening. George Yamak i stap long gutpela fom wantaim Siune Kagl na Israel Takap husat i bin go bek long skul long Is Nu Briten. Yamak ran wankain planti long 1500m long ol arapela fil na i bin ranawe wina long 4 minit 15.3 seken.

Ol arapela etlit i bin pait long kam namba tu namel long Abel Siune, Wilford Baia na Aquila Turalom wantaim ol WNB etlit. Yamak i bin winim tu 3000m long 9 minits 32.6 seken, Wilford Baia husat i pinis baksait long Yamak long 9 minit 33.4 na 10000m spesel rana Dilu Goiye i kam namba tri.

Long wankain taim bilong ol meri Cecilia Kuman husat i bin winim 1500m long 5 minit 36.8 seken i kamap namba wan pefoma na redi wankain ran long hevi trek long 3000m pastaim long las kilomita, lusim Anna Toby long pait strong wantaim Maty Kua. Kuman i bin SP Junia Meri Etlit bilong Yia long 2013 bihainim rekot bilong em long 2012 PNG Gems we em i bin kamap namba wan distens rana.  

Kuman i bin lusim spot long 2015 bihain long em i no bin makim tim long Pacific Gems. Em bilong Kerowagi ples na i bin kam bek long ran taim ol i bin statim dispela program. Ol Etletik opisal i amamas long lukim Mary Kua husat i bin makim 2015 Gems long kisim fom bek na pinis namba tu long tupela resis wantaim long 1500m na 3000m.

Narapela kompetisen bilong ol etlit em Etletiks PNG Grand Prix Siris bai kamap long Pot Mosbi long namba wan skul tem holide tasol bikos long COVID-19 na ol ogenaisesen husat i go pas long dispela kompetisen i bin senisim kalenda deit.

Jacklyn Kimala i raitim