OL foapela Pot Mosbi beis intasiti tim bilong Digicel Kap kompetisen i bin pilai trael mets bilong ol long las wik Sande long Sir John Guise Stedium.

Dispela 4-pela intasiti tim em Difending Sempian bilong las yia Kroton Hela Wigmen, Sentral Dabaris, Galp Isou na NCD Vipers. Wanpela klap i bin bruk namel long tupela tim long trael salens bikos ol klap frenshais na kosa i laik mekim fainel seleksen skwat bilong 2021 sisen.

Gem 1 i bin stap namel long NCD Vipers Tim 2 vs Galp Isou Tim 2, bihain Gem 2 em namel long Sental Dabaris Tim 2 v Hela Wigmen Tim 2, Gem 3 em namel long NCD Vipers Tim 1 v Galp Isou Tim 1 na  las mein Gem 4 em namel long Sentral Dabaris Tim 1 v Hela Wigmen Tim 1. Olgeta klap i bin resis wankain aninit long wan wan klap bilong ol.

Sental Dabaris i bin go pas long holim dispela trael mets long las wik Sande na dispela wik em NCD Vipers bai go pas long holim trael gen long wankain taim. Dispela trael mets i bin kamap bikos planti pilaia stap long trening olsem na klap i laik lukim talen bilong olgeta posisen insait long fil bihain long fainel skwat.

Long olgeta 4-pela klap trael mets, kosa bilong PNG Kumuls Michael Marum na ol arapela bikpela kosa na klap menesa tu i bin kamap long lukim gem bilong ol pilaia.

As tingting bilong dispela ol Mosbi beis klap, em long lukim na stretim ol asua insait long fil na makim namba wan beklain, fowat na hapbek bilong dispela yia Digicel Kap sisen.

Jacklyn Kimala i raitim