WIN bilong Pasifik Toea Wisil i save winim Gol Medol taitel olge­ta taim long kantri na karim plak raun long ol­geta hap bilong Pasifik Gems i bin tok bikpela sori tru long Gren Sif Sir Michael Somare.

Dispela hatwok bi­long em long kamap stia man bilong dispela nesen i bin givim strong long mi olsem wanpe­la strongpela PNG etlit meri long winim resis na flaim plak bilong kantri i go antap tru.

“Mi gat bikpela ting­ting long sanap strong wankain olsem Sir Mi­chael i bin pait strong long kisim Independens bilong kantri PNG na nau mi gat olgeta rait na fridom long trevol ovasis o resis long olgeta mak bilong wok,” Wisil i bin tokim Wantok Niuspe­pa.

“Papa bilong dispela Nesen Sir Michael i bin givim strong long mipe­la olgeta PNG etlits long wok bung wantaim na go het long karim plak raun.”

“Sir Michael i bin opim rot bilong mi long ka­map kwin bilong Pas­ifik long resis olsem na nau em bikpela salens bilong mipela ol yang­pela PNG long lukim na bihainim lek mak bilong em.”

“Mi no ting bai mi ka­map olsem long dispela kain mak tasol bikos Sir Michael i bin sainim rot bilong spot na opim doa bilong mipela long sain wantaim plak bilong PNG,” Wisil i tok.

Nau mipela bai traim sanap olsem strongpe­la Etlit bilong PNG na makim kantri wankain olsem Papa bilong PNG Sir Michael Somare i bin wokim long mipela.

 Jacklyn Kimala i raitim