MICHAEL Mexico husat i bin namba wan Papua Niugini long winim medol bilong Pioneer Weitlifta long Intenesenel Spot salens long Mexico taim em i bin gat 24 krismas long 1968.

Michael Mexico i bin haitim olsem Gren Sif Sir Michael Somare na Ledi Veronica i bin givim dispela nem ‘Michael Mexico’ long em long 1968 em 53 yia go pinis.

Taim Michael Mexico i bin harim olsem Sir Michael i dai nau em taim bilong em long serim dispela stori wantaim olgeta, stori we ol famili bilong em tasol i save inap 53 yia.

Long 1968 Michael Mexico i bin makim Niugini na nau nem senis kamap Papua Niugini.

Em i bin winim Brons Medol olsem namba wan spotman bilong PNG long winim long Intenesenel Spot Event.

Em i bin trevol long kantri Mexico i go Canberra, Australia we em bin stadi olsem sumatin tasol ol i bin senisim balus trevol bilong em na kamap long Jackson’s Ples balus.

“Taim mi bin kamap long Mosbi ples balus, Ledi Veronica na Sir Michael Somare tok halo long mi “Michael Mexico! Welkam bek long Mexico.”

Long dispela taim, Sir Michael i bin senisim nem bilong mi kamap Michael Mexico.

Em i bin joinim olgeta grup na givim rispekt long leit Gren Sif Sir Michael Somare.

“Mi tok sori long Ledi Veronica long i dai bilong Gren Sif Sir Michael.”

Em i bin lusim weitlifting long 1982 na nau em stap long Lae, Morobe Provins.