WIMEN Nesenel Soka Lig kompetisen bilong ol Sauten Konferens i bin kamap long las wik Sarere long Sir John Guise Stedium na ol Noten Konferens bai pilai dispela wik Sarere long Lae.
Bihain long fainel raun bilong tupela konferens, semi-fainel bai kamap long 13 Mas, 2021 long Lae. Tupela kwalifai tim bilong tupela konferens em Sauten Lig Wimen na Namba wan rana-ap bilong sisen.
Kompetisen Dairekta bilong PNGFA Paul Isorua i tok tupela lusa bilong semi-fainel bai resis long namba 3 na 4 ples taim tupela wina bai pait long namba 1 na 2 ples bilong 2021 WNSL taitel long 20 Mas , 2021.
Mista Isorua i tok tenkyu long gutpela sapot bilong WNSL kompetisen bai kamap gut na pinis wantaim bikpela mak.
Em i tok olgeta awot bilong mets na spesel awot bilong ol wan wan pilaia bai ol givim bihain long gren fainel.
Em i tok long semi-fainel Sauten Konferens lig wina bai pilai wantaim Noten Konferens namba 1 rana-ap na Noten Konferens lig wina bai pilai wantaim Sauten Konferens namba 1 rana- ap.
“Mi tok tenkyu long olgeta klap i sapotim ol meri pilaia long Sauten na Noten Konferens wantaim bikos dispela em rot bilong divelopim ol nupela talen long wan wan pilaia na tu kisim ol rurel talen,” em i tok.
Prais bilong WNSL kompetisen bihain long gren fainel em mani mak K80,000. Ol Sempian bilong taitel bai kisim K30, 000, Rana-ap bai kisim K25, 000, 2nd Rana-ap bai kisim K15,000 na 3rd Rana-ap bai kisim K10,000.
Jacklyn Kimala i raitim
wantokniuspepa.com